Եվ այսպես, երեկ` մարտի 20-ին, Ամերիկյան համալսարանի բիզնես կենտրոնում տեղի ունեցավ «Հայ բլոգերների ակումբի» 2-րդ հանդիպումը: Նախ, պետք է ասեմ, որ նախատեսված էր հանդիպումն անց կացնել այլ վայրում, որտեղ մասնակիցները պետք է տեղավորվեին շրջանաձև, որն էլ հանդիպմանը կտար թեթև և ավելի ոչ պաշտոնական բնույթ… Սակայն, հանդիպման վայրը որոշ պատճառներով տեղափոխվեց բիզնես կենտրոնի կոնֆերանսների սրահ:

Հանդիպման քննարկվելիք թեման, ինչպես և նախորոք հայտարարել էինք, հայկական բլոգոսֆերայի` որպես գովազդային հարթակի, հնարավորություններն ու ապագան էր: Բնականաբար, ոլորտի մոնետիզացիայի և առհասարակ օն-լայն մեդիա ոլորտի գովազդային հնարավորությունների մասին եղան տարբեր կարծիքներ, ինչպես հիմնականում բլոգերների կողմից, այնպես էլ բիզնեսի տեսանկյունից:

ՆեոՄեդիայի կողմից (այսինքն` մենք) ներկայացվեց հանդիպման թեմայի հետ կոնկրետ կապված նոր հայկական կայք` BlogoMarket.com անվանումով, որի հիմնական նպատակն է ապագայում հայկական բլոգոսֆերայի` գովազդային հարթակ հանդիսացող մասի և հայկական բիզնեսի ուղիղ խաչմերուկ ձևավորելը. Հենց այս կայքի մասին էլ եղան տարաբնույթ կարծիքներ, ընդ որում` բացասականն ավելի շատ… որոշ մասնակիցներ գտան, որ ընդհանրապես, մեր բլոգոսֆերան, ինչպես և մյուս հայկական ոլորտները, գովազդ կգտնեն ծանոթ և բարեկամների միջոցով, կարծիքներ եղան, թե առհասարակ հայկական ինտերնետի գովազդային հնարավորությունները շատ թույլ են, եղան և դրական ու պոզիտիվ կարծիքներ, ըստ որոնց հայկական բլոգոսֆերան և առհասարակ, բլոգինգ երևույը կարող է շատ բիզնես-ոլորտների համար կարևոր գովազդային հարթակ հանդիսանալ…

Մեծ մասով, մեզ և’ որպես բլոգեր, և’ որպես պոտենցիալ գովազդատու, հետաքրքիր էր լսել կարծիքներ` կապված բլոգոսֆերայի մոնետիզացման հետ, ինչպես նաև իմանալ, թե ընդհանուր ինչ տրամադրվածություններ կան հայկական բլոգոսֆերայում մեր գործունեության հետ: Որպես ՆեոՄեդիայի համահեղինակ և նաև համաադմինիստրատոր, կարող եմ ասել, որ ամեն ինչ հիմնականում արդեն պարզ է և մենք արդեն գիտենք` մեր հետագա անելիքների ուղղվածությունը որ կողմ է թեքվելու:

Հանդիպման երկրորդ մասում ներկայացվեց HSearch.am հայկական որոնողական համակարգի և նրա մի մասը կազմող Hanguyc Points հայկական կոնտեքստային գովազդային համակարգի մասին: Համակարգը դեռ համեմատաբար նոր է, և որն էլ մեծապես կախված է հայկական ինտերնետային հասարակության ձևավորման հետ, ինչպես նաև կարիք ունի հայ ինտերնետային օգտվողների, կայքերի ադմինիստրատորների և բեզնեսի հետաքրքրվածության:

hanguyc Points համակարգը թույլ է տալիս տեղադրել կայքերում և բլոգներում գովազդային բլոկներ, որոնց հղումներով կատարված այցելություների համար համակարգը վճարում է կայքին կամ բլոգին: Պոտենցիալ գովազդատուների համար նշեմ, որ համակարգում արդեն ընդգրկված են ավելի քան 60 կայքեր, որոնցում ցուցադրվում են համակարգի կոնտեքստային գովազդային բլոկները:

հարկավոր է շեշտել, որ Հանգույցը ներառում է նաև որոնողական համակարգ, որն էլ կոնտեքստային գովազդի հնարավորություններն ավելի է մեծացնում գովազդատուների համար:

Կայքի հասցեն` www.HSearch.am

Եվ մի փոքր նաև անդրադառնամ BlogoMarket.com կայքի և նրա ապագայի մասին.

Կայքի հասցեն` www.BlogoMarket.com / բլոգոսֆերա – բիզնես խաչմերուկ

Նպատակը` Հայկական բլոգոսֆերայի և բիզնեսի փոխինտեգրում. բլոգոսֆերա – բիզնես խաչմերուկ

Հնարավորություններ` կայքում դեռևս ստեղծված է բլոգների գրանցման ֆունկցիա. Հրապարակվում են բլոգների մասին տեղեկություններ, որոնք պատրաստ են տեղադրել իրենց ռեսուրսում որոշակի տարբերակներով գովազդներ (նշված են 4 գովազդային արբերակներ, որոնք կարող են ընտրել գրանցվողները): Կայքում տեղեկությունները հրապարակվում են ամբողջությամբ բաց տարբերակով, և կայքը չի հետապնդում որևէ եկամուտ` բլոգների և բիզնես հայտարարությունների հրապարակումից կամ գովազդային հաջող գործարքներից: (մանրամասները` տես www.BlogoMarket.com կայքում)

Կայքը դեռ մոտակա ժամանակներս կլինի բետա` փորձարարական տարբերակում: Այսինքն, կայքում կարող են տեղի ունենալ փոփոխություններ` կապված ֆունկցիաների, նոր ֆորմաների և այլնի հետ: Ինչպես նաև, կայքը տարբեր ինտերնետային պրովայդերների այցելուների համար կարող է ժամանակավորապես չգործել, քանի որ երեկվանից ունենք DNS-ների խնդիրներ, ինչի համար ներողություն ենք խնդրում բոլոր նրանցից, ովքեր հետաքրքրված սեղմում են հղումը և հայտնվում դատարկ էջում :|

www.BlogoMarket.com կայքը ապագայում կպարունակի նաև մաս` նախատեսված բիզնես առաջարկների և հայտարարությունների համար, որոնք կվերաբերեն հայկական բլոգոսֆերային: Ինչպես նաև, հնարավոր է ավելացվեն գրանցված բլոգների մասին որոշակի վիճակագրական տեղեկություններ պարունակող դետալներ:

Իսկ, ինչ վերաբերում է իմ անձնական տեսակետին` կապված հայկական բլոգոսֆերայի մոնետիզացիայի և մեր օն-լայն գովազդային ոլորտի զարգացման հետ, ապա գտնում եմ, որ այն դեռ ունի շատ զարգանալու տեղ, բայց հարկավոր է արագացնել այդ զարգացումը և ինտեգրումը մեր հասարակությանն ու գործող բիզնեսներին և որի համար էլ կազմակերպեցինք այս քննարկումը և ստեղծեցինք նոր կայք, որն էլ հուսով ենք` կօգնի այդ զարգացումների արագացմանը…

Շնորհակալ եմ բոլոր բլոգերներին և առհասարակ` բոլորին, ովքեր մասնակցեցին հանդիպմանը և մասնավորապես` քննարկումներին:

Հաջորդ հանդիպման մասին կտեղեկացնենք շուտով մեր բոլոր ռեսուրսներով, որը վերաբերելու է հայկական բոլորովին նոր բլոգային համակարգին. հանդիպումը կլինի ուղղակի պրեզենտացիոն տարբերակով, այսինքն, հատուկ թեմաներ չեն լինի ընդգրկված, ուղղակի կներկայացվի նոր համակարգը և կխոսենք հենց այդ ոլորտի մասին, որին էլ պատկանելու է նոր համակարգը:

** «Հայ բլոգերների ակումբի» 2-րդ հանդիպման մասին մեծ ռեպորտաժը կհրապարակենք երկուշաբթի` մարտի 22-ին:

——————————— տեղեկություն —————————

Կազմակերպիչների տվյալները.
NeoMedia Project. iSOCIAL initiation
www.neomedia.am
www.isocial.biz
E-Mail: info@neomedia.am
Twitter: www.twitter.com/neopromoter